Иттилоъ оид ба ҷаласаи Шӯрои Маҷлиси миллӣ

19 июн дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ҷаласаи навбатии Шӯрои Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид.
Тибқи рӯзнома дар ҷаласаи Шӯро 39 масъала мавриди баррасӣ қарор дода шуданд.
Маврид ба зикр аст, ки дар ҷаласаи навбатии Шӯрои Мачлиси миллӣ қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», «Дар бораи масъулият барои таълиму тарбияи кӯдак», «Дар бораи Донишгоҳи миллии Тоҷикистон» ва «Дар бораи нишондиҳанда барои ҳисобҳо» дар шакли мукаммал баррасӣ карда шуданд.
Дар ҷараёни кори ҷаласа аъзои Шӯро ҳамчунин як қатор санадҳои қонунгузориро оид ба ворид намудани тағйироту иловаҳо ба Кодекси ҷиноятӣ, Кодекси ҳуқуқвайронкунии маъмурӣ, Кодекси мурофиаи ҳуқуқвайронкунии маъмурӣ, Кодекси меҳнат, Кодекси андоз ва қонунҳои амалкунандаи Ҷумҳурии Тоҷикистон, аз ҷумла «Дар бораи Сарҳади давлатии Ҷумҳурии Тоҷикистон», «Дар бораи низоми иҷозатдиҳӣ», «Дар бораи Ваколатдор оид ба ҳуқуқи инсон дар Ҷумҳурии Тоҷикистон», «Дар бораи чарогоҳ», «Дар бораи муҳофизат ва истифодаи олами наботот», «Дар бораи карантин ва муҳофизати растаниҳо», «Дар бораи маориф», «Дар бораи пешгирии зӯроварӣ дар оила», «Дар бораи дигар пардохтҳои ҳатмӣ ба буҷет», «Дар бораи стандартонӣ», «Дар бораи созишномаҳо оид ба тақсими маҳсулот», «Дар бораи Бонки миллии Тоҷикистон», «Дар бораи ташкилотҳои маблағгузории хурд», «Дар бораи фаъолияти бонкӣ», «Дар бораи фаъолияти бонки исломӣ», «Дар бораи хизматрасониҳои пардохтӣ ва низоми пардохтӣ», «Дар бораи танзими асъор ва назорати асъор», «Дар бораи таърихи қарз (кредит)», «Дар бораи минтақаҳои озоди иқтисодӣ», «Дар бораи ангишт», «Дар бораи рамзҳои давлатии Ҷумҳурии Тоҷикистон», «Дар бораи ҳизбҳои сиёсӣ», «Дар бораи Ҷамъияти Ҳилоли Аҳмари Тоҷикистон» ва «Дар бораи истифода ва ҳимояи аломату номҳои Салиби  Сурх ва Ҳилоли Аҳмар дар  Ҷумҳурии Тоҷикистон» мавриди муҳокима қарор дода, дар ин хусус қарорҳои дахлдор қабул намуданд.
Инчунин, дар ҷаласаи Шӯрои Маҷлиси миллӣ пешниҳодҳои Ҳукумати Ҷумҳурии Тоҷикистон оид ба ҳалли масъалаҳои сохти маъмурию ҳудудӣ дар баъзе шаҳру ноҳияҳои вилояти Суғд, ноҳияҳои Варзоб ва Файзобод баррасӣ гардида, бо тартиби муқараргардида барои баррасӣ ба иҷлосияи ҳаждаҳуми Маҷлиси миллӣ пешниҳод карда шуд.